Forumi Rinor Islam në Tetovë realizoi manifestimin e shpalljes së semimaturantëve më të mirë në Tetovë dhe rrethinë nën moton “Të nxisim dijen, të investojmë për ardhmërinë”.
Manifestimi u realizua në sallën e Komunës së Tetovës ku të pranishëm ishin një numër i madh nxënësish, prindërit e tyre, drejtorë shkollash, përfaqësues të komunës si dhe aktivistë të shumtë të FRI-së.
Në fillimi ishin fjalimet e të pranishmëve të cilët folën për rëndësinë e mbajtjes së këtij aktiviteti. Fjalë rasti kishte kryetari i FRI-së, Mr. Xhabir Emini, i cili theksoi rëndësin dhe intencën pse pikërisht FRI në qytetin e dijes nisi këtë organizim vite më parë. Në fund fjalim përshëndetës kishte edhe nikoqiri i këtij aktiviteti Mevlan Abazi, kryetar i degës së FRI-së në Tetovë, i cili falenderoi drejtorët e shkollave për bashkëpunim korrekt në realizimin e këtij aktiviteti si dhe Komunën e Tetovës e cila gjithmon ka qenë në përkrahje të aktiviteteve rinore të FRI-së.
Pjesë e këtij eventi ishte edhe poezia ‘Perlat e heshtura’ e autorit Fatmir Muja, e recituar nga aktori Zurijet Sulejmani. Gjithashtu pjesë e këtij programi ishte edhe promovimi i librit “Me Naimin gjer te Naimi” autor i të cilit është Prof.Elez Ismaili, botimin e të cilit e ndihmoi Forumi Rinor Islam.
Në këtë manifestim u dekoruan 23 nxënës të shkollave fillore të Tetovës dhe komunave për rreth, ku çdo shkollë nga ana e kolegiumit të arsimtarëve dhe drejtoritë përkatëse e kanë zgjedhur semimaturantin më të mirë të shkollës së tyre.
Për të gjithë nxënësit e dekoruar, FRI ndau lëvdata, nga një shumë modeste në të holla, nga një pako me libra – botime nga “Furkan ISM” nga Shkupi, si dhe përparësi aplikimi në bursat për vitin e ri akademik 2023-2024.
Tetovë, 30 maj 2023
