Në kuadër të manifestimit jubilar “Në gjurmët e më të mirëve”, kryetari i Forumit Rinor Islam, z. Abdulhamid Mustafa, mbajti një fjalim frymëzues, duke përçuar mesazhe që përmbledhin misionin dhe vizionin e FRI-së.
Në hapje të fjalimit, ai rikujtoi vlerën themelore që udhëheq këtë manifestim: “Në traditën tonë, më i miri i njerëzve është ai që sjell më shumë dobi për të tjerët – me dije, me shërbim dhe me përkushtim.”
Kryetari theksoi se vlerësimi i nxënësve, studentëve dhe personaliteteve të dalluara nuk është vetëm ceremoni, por një mesazh për shoqërinë: “Asnjë përpjekje e ndershme nuk mbetet pa jehonë. Puna e sinqertë, dija dhe angazhimi shihen, vlerësohen dhe nderohen.”
Ai kujtoi se ky manifestim zhvillohet në një moment historik, për shënimin e 25-vjetorit të FRI-së: “FRI nuk është vetëm një organizatë, por një lëvizje. Nuk numërojmë thjesht vite, por zemra të prekura, gjenerata të formuara dhe ëndrra të zgjuara.”
Në pjesën kulturore të fjalimit, ai lidhte dijen me ngjarjet e mëdha të identitetit kombëtar: “Dita e Alfabetit dhe Dita e Flamurit na kujtojnë se alfabeti dhe liria janë amanete që na obligojnë të sillemi me dinjitet, si individë dhe si shoqëri.”
Ai foli për përgjegjësinë ndaj padrejtësive, duke theksuar dimensionin human dhe moral të shoqërisë: “Detyra jonë është të mos e normalizojmë padrejtësinë, të mos e relativizojmë vuajtjen e të pafajshmëve dhe të ruajmë zërin e drejtësisë.”
Duke iu drejtuar nxënësve dhe studentëve të nderuar, kryetari u përcolli një mesazh motivues: “Mirënjohja që merrni është vlerësim për të kaluarën, por edhe obligim për të ardhmen. Shndërrojeni çmimin në motivim – për dije më të thellë dhe kontribut më të gjerë shoqëror.”
Në mbyllje, ai falënderoi të gjithë ata që e bëjnë të mundur këtë traditë 25-vjeçare: “Ky manifestim është angazhim i përbashkët për të investuar në dije, karakter dhe shoqëri. Allahu i bekoftë të rinjtë, prindërit, profesorët, donatorët dhe aktivistët që e mbajnë gjallë këtë mision.”
Fjalimi i z. Abdulhamid Mustafa u shndërrua në një nga momentet më reflektive të mbrëmjes, duke rikujtuar se ecja “në gjurmët e më të mirëve” është një obligim dhe frymëzim për të gjitha gjeneratat.
