Intervista e Tarik Suvejdan lidhur me ngjarjet në Egjipt 2

Gazetari:”Çfarë mendoni me disa zëra të cilët  i kanë konsideruar Vëllezërit Myslimanë si havarixh, që kanë dalë kundër sovranit që erdhi në pushtet pas 3 korrikut, ashtu siç kanë dalë kundër vullnetit të popullit egjiptian.”
Dr Tarik Suvejdan:”Nuk janë Vëllezërit Myslimanë ata që e kundërshtuan sovranin, por janë ushtarakët ata që dolën kundër sovranit të zgjedhur nga vetë populli, të cilin arritën ta rrëzojnë me forcë. Mursi ishte në president i ardhur në pushtet nga votat e popullit, ai i fitoi zgjedhjet në mënyrë të ndershme. Po, është e vërtetë që diferenca ishte e ngushtë, por mos harrojmë se shumë presidentë të shteteve të mëdha si SHBA, janë zgjedhur me një diferencë të ngushtë votash, si në rastin e Bushit. Kjo është demokracia. Nuk ishin Vëllezërit Myslimanë ata që dolën kundër presidentit të zgjedhur, kundër legjitimitetit. Këta ulematë e pushtetit, të cilët janë kundër përmbysjes së pushtetit sot, përse nuk folën fare kur e rrëzuan Mursin e zgjedhur nga populli? Këto ditë, po bisedoja me një nga këta ulema të pushtetit dhe e pyeta:”Çfarë mendon për dikë që del kundër sovranit dhe orvatet ta përmbysë?” Ai më tha:”Ky është njeri i lig, keqbërës dhe i devijuar, prandaj dhe lejohet të vritet.” Unë e pyeta:”Mirë, po nëse ky njeri triumfon dhe arrin në pushtet, çfarë të bëjmë?” Ai më tha:”Në këtë rast, duhet ti bindemi, pasi është sovrani ynë.” I thashë:”Çfarë është kjo i nderuar?! Pak më parë më the se është njeri i devijuar, i lig dhe keqbërës, që duhet eliminuar, kurse tani më thua që duhet ti bindemi?!” Kjo lloj feje është opiumi i vërtetë i popujve.”
Gazetari:”Këtë rrugë ndjekin shumë nga ithtarët e selefizmit në Egjipt, të cilët thonë:”Tashmë jemi kushte të tjera, ku Sisi dhe ushtarakët e tij kanë mbërritur në pushtet dhe ne nuk kemi asnjë shteg tjetër përveç bindjes. Në këtë mënyrë, ne ndikojmë në mënyrë të drejtpërdrejtë në ndaljen e gjakderdhjes në vend.”
Dr Tarik Suvejdan:”Dua të them se nuk janë të gjithë selefët që i besojnë kësaj teorie. Ka shumë të tjerë që mendojnë krejtësisht kundër. Pika tjetër që dua të shtoj, është se nuk e shoh aspak të përshtatshme, që të konceptet politike të shekullit të dytë hixhri, ti zbresësh në aktualitetin tonë. Sot kemi marrëveshje sociale mes sovranit dhe popullit, sot kemi atë që e njohim si demokraci. Thuhet se është perëndimi ai që e solli si koncept dhe e zbatoi, por në fakt ky është parim islam. Kur u qëllua për vdekje kalifi Omer ibnul Hatab, zgjodhi gjashtë persona, të cilave u besoi zgjidhjen e kalifit pasues. Abdurrahman ibnu Auf ishte nga këta të gjashtë. Ai u tha të tjerëve:”Më lejoni që të marr edhe mendimin e komunitetit!” dhe ata pranuan. Nga konsultimet e bëra, ai pa se njerëzit pëlqenin hazreti Othmanin. Pranaj, ai vajti tek Aliu dhe para njerëzve i tha:”Dua të japësh besën, që nëse zgjidhesh kalif, të ecësh sipas parimeve të Kuranit, traditës së profetit Muhamed a.s dhe jetëshkrimit të dy kalifëve, Ebu Bekrit dhe Omerit.” Aliu i tha:”Jo, unë të jap besën se do të ndjek parimet e Kuranit dhe traditën profetike. Sakaq, për dy kalifët, ata kishin mendimet e tyre, kurse unë të miat.”
Abdurrahman ibnu Auf, e la Aliun dhe vajti tek Othmani, të cilit i tha të njëjtat fjalë dhe Othmani pranoi. Shohim që përzgjedhja e sovranit, është një marrëveshje mes tij dhe popullit. Sot, këtë e rregullon kushtetuta dhe kushdo që del kundër saj, ka prishur marrëveshjen e nënshkruar mes sovranit dhe popullit. Pyetja që shtrohet është: Në Egjipt, kush është ai që doli kundër kushtetutës dhe e prishi marrëveshjen mes sovranit dhe popullit, Vëllezërit Myslimanë, apo Sisi?
Sisi nuk është në postin e sovranit dhe udhëheqësit, madje, as që lejohet ta konsiderojmë si sovran dhe udhëheqës, pasi ai e shkeli kushtetutën, këtë marrëveshje sociale mes sovranit dhe popullit. Bazuar në këtë, ai është shkelësi i kushtetutës, ai është rebeli dhe ai duhet rrëzuar.”
Gazetari:”Ok, por prania e shehut të Ez’herit, i cili doli me 3 korrik, ditën e rrëzimit të Mursit dhe pezullimit të kushtetutës, në mbështetje të ushtrisë, a nuk i jep kjo puçit ushtarak, legjitimitetin fetar?”
Dr Tarik Suvejdan:”Në një nga programet e mia, kam folur për ulematë e pushtetit. Pushtetarëve u duhet një shtresë dijetarësh dhe ulemash, pasi e dinë ndikimin e madh të fesë tek njerëzit. Le të shtrojmë një pyetje me këtë rast:”Mos vallë shejhu i Ez’herit, është dijetari i vetëm në të gjithë umetin mysliman? Po dijetarët e tjerë të umetit, të cilët nuk janë më poshtë se shejhu i Ez’herit në dije? Çfarë të bëjmë me dijet e tyre? Ti hedhim në lum? Çfarë të bëjmë me reagimin logjik dhe objekti të usulistit Ahmed Rajsoni nga Maroku? Çfarë të themi për deklaratat dhe qëndrimin e shejh Jusuf Kardavit? Edhe mendimet dhe gjykimet e tyre janë gjykime dijetarësh dhe akademikësh të lartë! Përse u dashka vepruar sipas mendimit të shehut të Ez’herit dhe u dashka lënë mendimi i këtyre figurave të shquara të botës islame? Përse të mos pranojmë gjykimet e këtyre dijetarëve të pavarur dhe të refuzojmë ato të dijetarëve të pushtetit?”
Gazetari:”Doktor i nderuar! A mendoni se ngjarjet e fundit në Egjipt, kishin në shënjestër vetë islamin, apo projektin politik të islamistëve?”
Dr Tarik Suvejdan:”Ata që dolën kundër legjitimitetit në Egjipt, nuk mund ti fusim të gjithë në një kallëp. Po, mund të na duken të gjithë të një kallëpi, por nuk janë ashtu. Mes tyre ka të rinj të mirë, të përkushtuar dhe besimtarë, që e duan fenë dhe islamin, por që këtë rast, e kanë parë nga një këndvështrim tjetër politik. Këta nuk mund ti akuzoj se janë kundër islamit. Kishte edhe parti islame, si ajo e selefistëve, të cilët kishin qëndrimin e tyre, por në fund të fundit, ky është vlerësimi i tyre dhe mënyra si e kanë kuptuar atë që ndodhi. Për këta nuk mund të thuhet se kanë urrejtje ndaj islamit. Ajo që i çoi në këtë vendim dhe qëndrim, ishte thjesht këndvështrimi i tyre politik dhe kaq. Në historinë islame, ne kemi nga krerët më të mëdhenj të sahabëve, të cilët patën qëndrime të gabuara politike, ku mund të përmendim Talha ibnu Ubejdullah, Zubejr ibnu Avam etj… Ne nuk duhet të harrojmë se edhe njerëzit e mirë, gabojnë dhe mbajnë qëndrime që nuk duhen mbajtur. Po, në këto ngjarje ishin përfshirë, padyshim, edhe mbetje të regjimit të Mubarakut, ushtarakë, të blerë me miliarda dhe shumë të tjerë. Kishte edhe nga ata që e urrenin fenë dhe islamin. Prandaj dhe vendosja e të gjithë njerëzve në frontin e atyre që e urrejnë islamin, është gabim dhe e padrejtë.”
Gazetari:”Bazuar nga përvoja juaj dhe kontaktet që keni me historinë, a ndikon negativisht pushteti ushtarak, tek popujt që kanë nën sundim?”
Dr Tarik Suvejdan:”Pushteti ushtarak është një dramë dhe fatkeqësi e rëndë. A e dini se pasuritë e Geddafit, në Libi, llogaritën në 110 miliardë dollarë? Kjo, edhe pse ishte vend me pasuri të mëdha nëntokësore, kryesisht naftë. Nga dymbëdhjetë kritere për zhvillimin e një populli, Libia përmbushte vetëm një të vetëm, pasuritë, të cilat, ishin në dorën ushtarakëve si puna e Geddafit. Le të shohim Egjiptin. Gjatë pushtetit të Mubarakut, Egjipti ka qenë në regres të përshkallëzuar në arsim, ku Egjipti zinte vendin e 91 nga 130 shtete. Ky është produkt i diktaturave, të cilat ofrojnë çdo lloj luksi për një shtresë shumë të vogël, ndërkohë që masat e gjera janë në varfëri ekstreme. Ushtarakët nuk mendojnë për zhvillimin e vendit. Ata kanë në mendje vetëm armatimet dhe tanket.”
Gazetari:”A mund të na sillni disa modele të tjera në rang ndërkombëtar të shteteve ushtarake, si Pakistani dhe Turqia më parë?”
Dr Tarik Suvejdan:”Ka plot modele shtetesh të tillë, ashtu siç ka dhe përjashtime. Në çdo shtet, përgjithësisht, pushteti ushtarak e çon vendin në regres të vazhdueshëm. Por, edhe nëse vendi zhvillohet, ky zhvillim është i kufizuar në një ose dy fusha, kryesisht në industrinë ushtarake. Iraku gjatë sundimit të Sadamit, njihej vetëm për progresin ushtarak. Siria e sotme, është e prapambetur në çdo fushë, përveç asaj ushtarake. Dhe çështë më e keqja, tanket dhe armatimet e këtyre vendeve, nuk përdoren kundër armiqve,  por kundër vetë popujve.”
Gazetari:”Ushtria egjiptiane ka ndërmarrë një fushatë për mbylljen dhe bllokimin e të gjithë tuneleve që janë hapur në kufirin mes Gazës dhe Egjiptit, prej ku dhe trafikohen lëndët ushqimore bazë për banorët e Gazës, të cilët ka vite që janë nën bllokadën izraelite. Cili është mendimi juaj për këtë?”
Dr Tarik Suvejdan:”Unë sinqerisht nuk e kuptoj përse janë hapur tunele të tilla, nuk e kuptoj përse Egjipti është bërë palë me Izraelin në bllokadën ndaj Rripit të Gazës, përse Egjipti i persekuton palestinezët, kryesisht të Gazës. Ato tunele nuk duhej të ekzistonin, dhe kufijtë mes Egjiptit dhe Rripit të Gazës duhet të ishin të lira për qytetarët e dy vendeve.”
Gazetari:”Çfarë mendoni lidhur me qëndrimin e liberalëve egjiptianë, të cilët mbajtën anën e ushtrisë, edhe pse më parë kanë folur me superlativa lidhur me rëndësinë e garantimit të lirive, demokracisë, pluralizmit, zgjedhjeve të lira…”
Dr Tarik Suvejdan:”Po, ata e duan garantimin e lirive, por ato liri që mbështesin idetë e tyre dhe jo liritë që sjellin islamikët në pushtet. Nëse bëhet fjalë për ardhjen e islamikëve në pushtet, këta liberalët, shndërrohen në përjashtues, të dhunshëm, agresivë dhe shtypës. Njerëz të tillë fshihen pas maskës që e quajnë liberalizëm, por që fytyra e vërtetë e tyre, është interesi personal. Këtu nuk flitet për parime, por për interesa. Revolucioni i Sirisë zbuloi realitetin e shumë njerëzve dhe organizmave, ndërsa revolucioni egjiptian i demaskoi ata. Revolucioni egjiptian i demaskoi liberalët dhe demokratët, demaskoi ulematë dhe ftuesit, shtete dhe biznese të fuqishme. Zoti në Kuran na thotë:”Mos e mendoni diçka të keqe për ju, por është diçka e mirë.”
Gazetari:”Thuhet se nëse ke në dorë mediat, do të kesh sukses në të gjitha betejat e tua. Në Egjipt, puçistët kanë në dorë të gjitha mediat pothuajse, shtetërore apo private qofshin.”
Dr Tarik Suvejdan:”Ke të drejtë, por le të shtrojmë një pyetje:”Vëllezërit Myslimanë në Egjipt, për tetëdhjetë vite me radhë, janë demonizuar dhe kanë qenë nën presionin e mediave. Megjithatë, në zgjedhjet e para të lira, ishin pikërisht Vëllezërit Myslimanë ata që fituan. Në pesë referendume të zhvilluara në Egjipt, të pestë janë fituar nga islamikët. Po, mediat mund të ndikojnë përkohësisht në mendjet e njerëzve, por jo përgjithmonë.”
Gazetari:”Doktor Tarik, kohët e fundit, ju jeni shprehur në shumë raste se jeni nga liderët kryesorë të Vëllazërisë Myslmane në Kuvajt. Pyetja që dua të shtroj është:”Përse e keni theksuar kaq shpesh identitetin tuaj, në këto kohë trazirash dhe ku shumë kollaj mund të të ngjitet akuza e terrorizmit. Vlen të them se nga këto deklarata tuajat, ju jeni shkarkuar dhe nga posti i drejtorit të përgjithshëm të kanalit Risala, nga pronari i saj Velid bin Talas.”
Dr Tarik Suvejdan:”Fakti që unë jam nga liderët e Vëllezërve Myslimanë në Kuvajt, nuk është diçka e re. Që kur jam kthyer nga Amerika në vitin 1991, kam deklaruar se jam nga krerët e udhëheqjes së Vëllezërve Myslimanë. Diçka të tillë e kam thënë në media të ndryshme, si të shkruara dhe ato vizive. Lidhur me princin Velid bin Talal, mund të them se kam pasur marrëdhënie miqësore për kushedi sa vite. Ishte mirësi e Zotit si për mua ashtu dhe për princin, që ishim ortakë në një projekt islam, me të cilin krenohem dhe jam i lumtur që do dal para Zotit Ditën e Kiametit me një kontribut të tillë, si ai në kanalin Risala, një kanali të moderuar islam. Zoti është dëshmitar, ashtu siç janë dëshmitarë teleshikuesit, që nuk e kam shfrytëzuar kanalin për të reklamuar aktivitetin e Vëllazërisë Myslimane, apo të çfarëdo xhemati dhe partish politike të tjera.”
Gazetari:”Princi Velid bin Talal, në deklaratën e tij lidhur me shkarkimin tuaj nga posti i drejtorit të përgjithshëm të kanalit, thotë se ai është njoftuar lidhur me deklaratat tuaja në faqet sociale, se i përkisni një orientimi i cili bie ndesh me orientimin e kanalit, i cili i përket linjës së mesme, nuk përcjell zërin e asnjë xhemati apo rryme të caktuar dhe se deklaratat tuaja nuk përkojnë me politikat e kanalit…”
Dr Tarik Suvejdan:”Siç e thashë, unë e kam deklaruar edhe më parë se i përkas krerëve të Vëllazërisë Myslimane, jo vetëm kohët e fundit. Ajo që duhet ditur, është se kanali nuk është shndërruar asnjëherë në zërin e Vëllazërisë Myslimane. Kanali i është përmbajtur me rigorozitet linjës së mesmes së artë, ka qenë i hapur për të gjithë, nuk i është nënshtruar asnjë rryme apo partie. Unë e kam respektuar dhe i jam përmbajtur kësaj politike të kanalit. Për këtë, kam dëshmitar Zotin dhe teleshikuesit që e ndjekin kanalin. Megjithatë, them që diversiteti në mendime, nuk e prish miqësinë. Unë kam pasur marrëdhënie respekti dhe vlerësimi reciprok me princ Velidin. Unë e falënderoj Zotin se shkarkimi im nga detyra që mbaja, nuk ishte për ndonjë shkelje financiare, morale, ekonomike apo çfarëdo tjetër.”
Gazetari:”Po cili është shkaku atëherë, që princi Velid e mori këtë vendim, pikërisht në këtë kohë?”
Dr Tarik Suvejdan:”Mund ta pyesni atë. Reagimi im i vetëm ka qenë që e kam falënderuar, i thashë se nuk do e harroj miqësinë mes nesh dhe respektin reciprok, i thashë se ky kanal, Risale, nuk do ta kishte parë dritën e diellit, sikur të mos ishte mbështetja e princ Velidit. Ajo që ndodhi, nuk ka përse të ndikojë në miqësinë time me Princin. Unë jam njeri mirënjohës dhe besnik ndaj miqve dhe atyre që më kanë bërë mirë. Dinjiteti dhe parimet e mia, nuk më lejojnë që të them qoftë dhe një fjalë të vetme e cila cenon personalitetin e princ Velidit.”
 
Vazhdon…