Dr.Jusuf el-Karadavi
Kur’ani ka dëftuar se krishterët e shpikën nga vetja murgërinë. I Lartmadhërishmi ka thënë:<<…ndërsa murgërinë ata vetë e shpikën. Ne atë nuk ua bëmë obligim atyre, mirëpo edhe pse kishin për qëllim me të vetëm të arrijnë kënaqësinë e Allahut, ata nuk iu përmbajtën asaj si duhet përmbajtur…>>.
Në një hadith të përcjellur prej Enesit, e të atribuar të Dërguarit të Allahut s.a.v.s. qëndron:”Mos u bëni të ashpër e ta randoni vetveten, që pastaj ndaj ju të veprohet me ashpërsi. Kjo, ngase disa njerëz u bënë të ashpër me vetveten, dhe u veprua me ashpërsi ndaj tyre. Gjurmët e tyre i gjeni në manastire dhe vendqëndrimet e tyre: murgërinë ata vetë e shpikën. Ne atë nuk ua bëmë obligim atyre”.
Poashtu, në një hadith tjetër të atribuar të Dërguarit të Allahut s.a.v.s. qëndron:”Mos e randoni veten, ngase ata që ishin para jush u shkatërruan për shkak se e randuan vetveten. Gjurmët e tyre do t’i gjeni në manastire dhe vendqëndrimet e tyre”.
Murgëria është një formë e teprimit në sjelljen fetare, ndërkaq Islami ndërtohet mbi baraspeshë dhe mesatari në çdo gjë:<<Dhe ashtu Ne u bëmë juve një popull të drejtë (një mes të zgjedhur)…>>.
prej arabishtes:Bashkim Aliu