Forumi Rinor Islam organizoi takim të përbashkët me 106 bursistë të të gjitha degëve ku vepron Forumi Rinor Islam. U realizua hapi i parë i rrugëtimit të njohur si “Bursë studentore për student dhe shkollarë të mesëm”, në hapësirat e reja të FRI-së.
Aktivitetin e filloi moderatorja e këtij aktiviteti, Hafsa Ibishi e cila tregoi për rëndësinë e këtij takimi me ç’rast pati një fjalim përshëndetës edhe nikoqiri i këtij takimi, kryetari i Forumit Rinor Islam, mr. Xhabir Emini i cili i përgëzoi bursistët për suksesin e arritur.
Prezantimin e Forumit Rinor Islam e bëri zëvendëskryetarja e Forumit Rinor Islam, Zuljeta Fetaovska ku tregoi për veprimtarinë e FRI-së vite me radhë.
Ishte e pamundur të kesh kaq shumë të ri të përzgjedhur e të mos mbushet programi me promovimin, përkujtimin si dhe nxitjen e të mirës, të bukurës, të dobishmes si dhe energjisë rinore. Andaj, për të ngjalluar shkëndijën e motivit, vullnetit dhe aspiratës në çdo shpirt rinor, ishte e ftuar ligjëruesja Kujtesa Xheladini.
Për fund, Forumi Rinor Islam gjithashtu dhuroi nga një komplet të librave për çdo bursist.
Shkup, 19 nëntor 2022
