Departamenti i Femrës pranë Forumit Rinor Islam – Dega Shkup përmbylli Kursin e Fikhut në Info Qendrën e FRI – së. Ky kurs kishte për qëllim njohjen dhe fitimin e njohurive të reja rreth jurisprudencës islame. Është realizuar çdo të shtune, e si ligjëruese ishte teologeja Esma Sherifi Kurti e cila çdo javë trajtonte tema të rëndësishme të kësaj lëmie që zënë vend të rëndësishëm në jetën e besimtares.
Në përmbyllje të kursit u realizua një program modest i cili filloi me leximin e disa ajeteve nga Kurani Fisnik, pastaj vijuan edhe disa ilahi. Nuk munguan edhe disa këshilla nga vet ligjëruesja e këtij kursi. Për pjesëmarrëset të cilat iu nënshtruan një testimi vlerësues para disa ditësh, u shpërndanë diploma për përfundimin e kursit. Fjalë rasti kishte përgjegjësja e Departamentit të Femrës pranë FRI – së, Dega Shkup, Isra Sherifi e cila përgëzoi pjesëmarrëset për ndjekjen e kursit, theksoi vlerën e diturisë dhe të atyre që mundohen ta fitojnë atë. Dhe në fund si shenjë falenderimi dhe mirënjohjeje iu dhuroi dhurata modeste ligjërueses dhe përgjegjëses së kursit.
