Forumi Rinor Islam, përmes këtij reagimi zyrtar, shpreh shqetësimin e thellë dhe indinjatën mbi ngjarjet e fundit të dhunës fizike mes nxënësve të shkollës fillore “Dituria” në Saraj, si edhe incidentet e ngjashme të raportuara në disa shkolla të tjera në vend.
Pamjet dhe dëshmitë e qarkulluara në opinion dhe rrjetet sociale kanë krijuar një atmosferë pasigurie dhe shqetësimi të thellë, duke ngritur pikëpyetje serioze mbi nivelin e sigurisë që u ofrohet fëmijëve brenda institucioneve arsimore.
Kërkojmë nga Ministria e Arsimit dhe Ministria e Punëve të Brendshme:
- Hetim të plotë, të shpejtë dhe transparent të çdo incidenti të raportuar, përfshirë rastin e fundit të përleshjes së nxënësve në Saraj.
- Rritje të masave të sigurisë në ambientet shkollore, me theks të veçantë në parandalimin e dhunës dhe praninë e koordinuar të strukturave përgjegjëse.
- Fuqizimin e kapaciteteve profesionale të psikologëve dhe punëtorëve socio-pedagogjikë, duke shtuar numrin e tyre dhe duke e thelluar rolin e tyre në ndërhyrjet e hershme dhe të vazhdueshme.
- Zbatim të rreptë të protokolleve zyrtare për reagimin ndaj dhunës në shkolla, si dhe përfshirje aktive dhe të përgjegjshme të prindërve në procesin arsimor.
- Organizimin e fushatave senzibilizuese, në nivel lokal, me synim ngritjen e vetëdijes mbi pasojat e dhunës, forcimin e komunikimit dhe promovimin e edukimit etik dhe qytetar tek fëmijët, prindërit dhe komuniteti në tërësi.
Forumi Rinor Islam, duke e konsideruar edukimin si themelin e zhvillimit individual dhe shoqëror, shpreh gatishmërinë e plotë për të kontribuar përmes programeve edukative, iniciativave për parandalimin e dhunës dhe kultivimit të vlerave morale tek fëmijët dhe të rinjtë.
U bëjmë thirrje të gjithë aktorëve relevantë që të veprojnë me urgjencë, profesionalizëm dhe përgjegjësi të plotë.
Shkup, 13 dhjetor 2025
