Forumi Rinor Islam – Dega Shkup vazhdoi aktivitetet edukative në kuadër të trajnimit “Liderët e Rinj”, i cili u mbajt më 31 tetor dhe 1 nëntor 2026, duke u ofruar të rinjve hapësirë për të fituar njohuri të reja dhe për të zhvilluar aftësi të rëndësishme për të ardhmen e tyre.
Programi i ditës së sotme nisi me shtjellimin e temës: “Zhvillimi i Inteligjencës Emocionale” nga Prof. Dr. Musa Musai, ku u trajtua rëndësia e njohjes, kuptimit dhe menaxhimit të emocioneve. Përmes kësaj teme u theksua ndikimi i inteligjencës emocionale në komunikim, marrëdhëniet ndërpersonale dhe mënyrën se si individët përballen me situata dhe sfida të ndryshme.
Në vazhdim, Prof. Dr. Abil Baush trajtoi temën: “Strategjitë e Zhvillimit Personal dhe Profesional”, duke theksuar rëndësinë e përcaktimit të objektivave, planifikimit të së ardhmes dhe shfrytëzimit të potencialeve individuale. Ai ndau me pjesëmarrësit këndvështrime mbi mënyrat e avancimit të vazhdueshëm, ndërtimit të shkathtësive dhe krijimit të një qasjeje të qëndrueshme drejt suksesit personal dhe profesional.
Të dy sesionet edukative sollën perspektiva të ndryshme, por plotësuese mbi formimin e një lideri të përgjegjshëm, duke vënë në pah se udhëheqja e mirë kërkon jo vetëm njohuri dhe aftësi profesionale, por edhe pjekuri emocionale, vetëdije dhe gatishmëri për zhvillim të vazhdueshëm.
Trajnimi “Liderët e Rinj”, i zhvilluar përgjatë dy ditëve, më 31 tetor dhe 1 nëntor 2026, u përmbyll me një përvojë edukative që synon të motivojë të rinjtë të investojnë në veten e tyre, të njohin më mirë potencialin që posedojnë dhe të përgatiten për sfidat dhe përgjegjësitë që i presin në të ardhmen.
📢 Lideri i së ardhmes ndërtohet përmes vetëdijes, dijes dhe përkushtimit për t’u zhvilluar çdo ditë!
Shkup, 1 nëntor 2026